2 Raja-raja 4

Denmi misa’ tu mintu’ bainena passikola nabi mengkamoya lako Elisa sia ma’kada nakua: Iatu taummi, muaneku, matemo sia miissan kalena, kumua iato taummi mengkaola lako PUANG. Na totemo saemo to ma’paindan la unnalai tu anakku da’dua la napokaunan.

Nakuami tu Elisa lako: Apara tu ma’din la kupogaurangko? Pokadanna’ apara lan banuammu. Mebalimi nakua: Tae’ bangmo apa-apa lan banuanna taummi sangadi misa’ tonde nanii minna’.

Ma’kadami tu Elisa lako nakua: Maleko lako salian, ammu palaku busso lako mintu’ sangbanuammu, iamotu busso lo’bang; pebudai mupalaku.

Ammu tama banua, musalli’i tu ba’ba dio boko’mu sia dio boko’na anakmu muane, mutua’i tu minna’ tama busso iato; umba tu ponno, palelei.

Malemi natampe baine iato, anna salli’i tu ba’ba dio boko’na sia dio boko’na anakna muane: na anakna tu nenne’ umbaai tu busso lako, na ia nenne’ untua’i tama.

Iatonna ponnomo tu mintu’ busso, ma’kadami lako anakna nakua: Bampa’ mai misa’ tu busso. Apa mebali tu anakna nakua: Tae’mo busso. Tadangmi tu minna’.

Malemi tu baine iato umpokadanni taunNa Puang Matua, nakuami ungkuanni tu baine: Malemoko, balukanni tu minna’ iato, bayaranni indanmu, na iatu la’binna la mupotuo sola tu mai anakmu.

Den sangallo malemi tu Elisa lako Sunem. Denmi dio tu misa’ baine sugi’, tu umpalaku tonganni lako Elisa, kumua anna torro kumande. Undinnato, kemaleomi ullendu’i tondok iato, lendu’mi lako, anna kumande.

Ma’kadami tu baine iato lako muanena, nakua: Tonganna kuissan, kumua iatu taunNa Puang Matua, tu lendu’ nenne’ lako kaleta, misa’ to masero.

Melo tagaraganni misa’ bilik bitti’ mengkadaoan dirinding tembo’, na inde to tanii umpannianni misa’ kamammaran, misa’ meda, misa’ kadera na misa’ tongkonan palita, kumua ianna lendu’ lako kaleta, inde to ma’din nanii ma’bongi.

Den sangallo saemi lako, torromi dio dao bilik mengkadaoan, anna mamma’ dio.

Nakuami lako Gehazi to ma’kamayana: Tambai tu baine to Sunem. Natambaimi anna bendan dio olona.

Nakuami lako Gehazi: La ma’kadako lako kumua: Tonganna masussakomi umposara’kan, apara tu ma’din la kupogaurangkomi. Denraka kara-karami tu ma’din kubisara lako datu ba’tu lako kamandang lompo? Mebalimi nakua: Torrona’ aku sola sangdadiangku.

Nakuami Elisa: Apamora la kupogauranni? Mebalimi Gehazi nakua: Tae’ ia dikka’ nama’dadian muane sia iatu muanena matuamo.

Nakuami Elisa: Tambaimi. Malemi natambai anna bendan dio to’ ba’ba.

Ma’kadami tu Elisa lako nakua: Attu ia bangsiamote, ke taun pole’i, ammu raka’ misa’ pia muane! Mebalimi tu baine nakua: Da mima’kada susito puangku, taunNa Puang Matua, da dikka’ mima’kada tang tongan lako taummi.

Ma’tambukmi tu baine iato anna kianakan misa’ pia muane to attu ia bangsiamoto tonna lendu’mo sangtaun, susitu mangka napokada Elisa lako kalena.

Iatonna kasallemo tu pia, den sangallo namale lako ambe’na, tu marassan untiro to megandung.

Nakuami lako ambe’na: O indo’! ulungku, ulungku! Ma’kadami tu ambe’na lako misa’ taunna, nakua: Solanni lako indo’na.

Naangka’mi nabaai lako indo’na. Unno’ko’mi tu pia diong rianna indo’na sae lako ma’tangnga allo, pakalan namatemo.

Kendekmi tu baine iato, napamamma’i tu anakna dio to’ kamammaranna taunNa Puang Matua sia nasalli’ ba’ba.

Tassu’mi lako salian untambai muanena, nama’kada lako nakua: Suanna’ misa’ tau nabaai tu misa’ keledai birang; kumale madomi’ umpellambi’i tu taunNa Puang Matua, kumane sule.

Mekutanami tu muanena nakua: Ma’apari mula malera lako te allo iate? Na tangia bunga’ sombona bulan ba’tu allo katorroan. Mebalimi nakua: Da mupomasussai to.

Nalapikmi tu keledai birang, nakuai lako taunna: Patikara-karai lumingka, da’ito kupatarru’ bangi lumingka, da anta melayo, sangadi ke kukuapi.

Susito malemi anna rampo lako taunNa Puang Matua dao buntu Karmel. Iatonna tiromi taunNa Puang Matua tonna mambela-belapa, ma’kadami lako Gehazi taunna, nakua: Tiromi saemo tu baine to Sunem.

Totemo malemoko madomi’ untammui sia ma’kada lako kumua: Malaga’-laga’ siarokomika, sola tu ambe’na anakmi sia anakmi? Mebalimi nakua: Malaga’-laga’ nasang siakan.

Iatonna rampomo lako taunNa Puang Matua dao buntu, naraka’mi tu lette’na. Nareke’mi Gehazi la ullendokanni, apa nakua taunNa Puang Matua: Popa’elo’nai, belanna bonnong tu penaanna, apa Nabunianna’ PUANG sia tae’ Napaissannina’.

Ma’kadami tu baine iato nakua: Malakura’ka lako puangku umpalaku misa’ pia muane? Tae’raka kuma’kada kumua: da mima’kada tang tongan lako kaleku.

Nakuami Elisa lako Gehazi: Ma’tambeke’ko, tangkei tu tekkenku ammu male; ianna den tau musitammuan da musalama’i, ianna deno tau ussalama’ko da mubalii, ammu patorroi te tekkenku dao to’ lindona tu pia.

Apa nakua tu indo’na pia iato: La lelukraka tuoNa PUANG sia tonganna susi tuomi, tae’ kula untampekomi. Ke’de’mi tu Elisa, namale unturu’i.

Iatu Gehazi dolo ia male na iatu tau sola duai, napatorroi tu tekken dao to’ lindona tu pia; apa tae’ra gamara dirangi sia tae’ra tanda pangingaranna. Sulemi nasitammu, anna pokadanni kumua: Iatu pia tae’ bang napandiu.

Iatonna tamamo banua tu Elisa, natiroi matemo tu pia, sumpandan dao kamammaranna.

Iatonna lanmo tu Elisa nasalli’mi tu ba’ba dio boko’na sola duai, anna massambayang lako PUANG.

Mangkato lumbangmi daona lu pia iato; napasitammumi tu pada pudukna sia pada matanna sia pada limanna sia napalumbang tu kalena rokko pia iato. Pakalan malassumi sule tu kalena tinde pia.

Mangkato, mengkalaomi sule, anna male pissan lu lako lu dio mai lan banua iato, mangkato kendekomi langngan, anna palumbangi tu kalena rokko. Ta’kala sumbaenmi pempitu tu pia anna bungka’i tu matanna.

Natambaimi tu Gehazi, sia nakua lako: Tambai tu baine to Sunem. Iatonna tambaimi saemi tu baine iato lako kalena, anna ma’kada tu Elisa lako nakua: Angkarammi tu anakmi.

Tamami anna tukku menomba diong to’ lette’na sae rokko padang. Mangkato naangkarammi tu anakna, namale.

Undinnato sulemi tu Elisa lako Gilgal, tonna karorian lan tondok iato. Iatonna marassan tu mintu’ passikola nabi unno’ko’ dio tingayona, ma’kadami lako taunna nakua: Patonangngi tu kurin kapua, ammu tolloranni utan tu mai passikola nabi.

Tassu’mi tu misa’ nalao undaka’ utan dio lu padang, naappa’mi tu misa’ apa merroro, naalami tu buanna, iamotu katimun pangala’, nabungku’i sambu’na. Iatonna sulemo, nasasa’ sibitti’mi, napatamai kurin tu nanii utan lan, belanna tae’ natandai tau iato mai.

Dipalennaranmi kande tu tau iato mai la nakande. Apa iatonna kandemi tu utan iato, metambami nakua: O taunNa Puang Matua! den ia dipomatena lan tu kurin! Tae’mi nama’din ungkandei tau iato mai.

Apa ma’kada tu Elisa nakua: Alai tu ta’pung. Napatamami kurin tu ta’pung, nakua: Totemo palennaranmi te tau buda anna kandei. Moi misa’ tae’mora kadakena lan tu kurin.

Pakalan saemi tu misa’ muane dio mai Baal-Salisa, tu umban roti taunNa Puang Matua lan kandu’, iamotu bunga’ bura padang, duangpulo roti dalle sisikan sia passara’buk. Nakuami tu Elisa: Benni te mai to buda anna kandei.

Nakuami tu taunna: Umbara la kukua umpalenna’i te lako muane saratu’? Ma’kadami tu Elisa nakua: Ben bangmi te mai to buda anna kandei. Belanna inde sia tu kadanNa PUANG Nakua: La nakande tau, anna denpa sesanna.

Napalennaranmi tau iato mai anna kandei, anna sesapi, susitu kadanNa PUANG.